Atvinnuþróunarfélag Þingeyinga, Útflutningsráð Íslands, Rannsóknarmiðstöð ferðamála og Svartárkot menning-náttúra, boða til tveggja daga námssmiðju / workshop á Hótel Gíg í Mývatnssveit, dagana 2. til 4. september 2009 um Geo- ferðaþjónustu / geotourism á norðausturlandi.
Aðalfyrirlesari og stjórnandi vinnuhópa verður Dr. David Newsome, aðstoðarprófessor við Murdoch háskólann í Ástralíu.
Ráðstefnan er ætluð ferðaþjónustuaðilum og þeim sem áhuga hafa á viðfangsefninu.
Fyrirlestrarnir verða þýddir á íslensku.
Nánar um námssmiðjuna, dagskrá og skráningu
Tilboð til íslenskra stúdenta.
Svartárkot, menning – náttúra býður upp á þrjú námskeið sem kennd verða í Bárðardal í sumar (2009). Námskeiðin eru þverfagleg og henta stúdentum í ýmsum fræðigreinum. Hvert námskeið gefur 10 ECTS einingar og gefur Háskólinn á Akureyri út námsmat. Námskeiðin eru alþjóðleg og fer öll kennsla fram á ensku. Hin þverfaglega nálgun og hið alþjóðlega umhverfi ætti að henta vel íslenskum stúdentum sem vilja víkka sjóndeildarhringinn. Sumarið 2009 verða þessi námskeið kennd:Local Environments - Global Impacts (BA / BS stig). 20.-28. júní, 2009. Könnuð er saga landbúnaðar og umhverfis í Bárðardal og nágrenni ásamt gagnvirkni náttúru og mannlegs samfélags, fyrir og eftir nútímavæðingu
Writing Local Cultures (Meistaranámsstig): 4.-12. júlí, 2009. Meginviðfangsefni námskeiðsins er handritamenning síðari alda (1550-1900). Áherslan er á handrit sem miðil á tímum prentlistar og sambúð þessara tveggja miðla á árnýöld og nútíma. Samhliða verður fjallað um samspil handritarannsókna og staðbundinnar (local) og smásærrar (microhistorical) nálgunnar við endurskoðun menningarsögu.
Iceland Geography (BA / BS stig): 8.-16. ágúst, 2009. Stúdentar kanna landfræði mannvistar og náttúru í Bárðardal og nágrenni með verkefnum og í ljósi kenninga landslagsfræða með sérstakri áherslu á kosti og galla ferðamennsku í afskekktri byggð og viðkvæmu umhverfi.
Öll námskeiðin fela í sér heimavinnu fyrir og eftir dvölina í Bárðardal.
Verð hvers námskeiðs - sértilboð til íslenskra stúdenta:
Meistaranámsstig: 85.000 kr.
BA / BS stig: 70.000 kr.
Við það bætist: gisting, uppihald og skoðunarferðir.
Gisting og uppihald kostar 9.500 kr. á dag eða 85.500 fyrir alla dagana.
Skoðunarferðir kosta alls 25.000 kr.
Fullt verð fyrir BA / BS nemendur er því 180.500 kr.
Ekki er nauðsynlegt að kaupa allan þann pakka, t.d ef stúdentar hafa aðra gistimöguleika.
Nánari upplýsingar og umsóknareyðublöð má nálgast annars staðar á þessum vef.
Umsóknarfrestur er til 15. maí (póststiplill gildir).
Háskóli Íslands hefur samþykkt að námskeiðin verði metin til eininga við þann skóla og gildir það amk um efitrfarandi:
Local Environments - Global Impacts er gilt til eininga í sagnfræði og landfræði.
Writing Local Cultures er gilt til eininga í íslensku.
Iceland Geography er gilt til eininga í landfræði og ferðamálafræði.
Námskeiðin ættu að gilda þegar LÍN reiknar einingar vegna láns til framfærslu en óvissara er hvort Lánasjóðurinn lánar fyrr námskeiðsgjöldum og á eftir að láta reyna á það
.
FRÉTTIR
Útilegumenn í Ódáðahrauni - goðsögn eða veruleiki? - sögusýning í Kiðagili í Bárðardal
Segja má að útilegumenn séu „frekir til fjárins“ í íslenskri menningu. Þeir eru áberandi í bókmenntunum, á leiksviðinu og í fornsögunum. Þrjár Íslendingasagna hafa útlaga sem aðalpersónu og nægir þar að nefna Gretti sögu. Útlagar fornsagnanna eru harmrænar persónur. Þeir eru hart leiknir af gráglettni örlaganna eða verða fyrir óláni af einhverju tagi. Þeim er úthýst úr samfélaginu fyrir eitthvað sem í dag virðast litlar sakir. Samt sem áður ber að hafa í huga að flestir voru útlagarnir afbrotamenn sem treystu sér ekki til að búa með öðru fólki. Þeir neyddust til að draga fram lífið í útjaðri samfélagsins með ránum og rupli og ílentust utangarðs. Sögur af útlögum í fornsögunum minna oft á útlagana í villta vestrinu, en margir hafa bent á líkindi með þessum sagnaheimum.
Útilegumenn var að finna á Íslandi allt fram á 19. öld, en eftir móðuharðindin 1783 virðist sem þeim hafi farið að fækka mjög, en það ár dó einmitt sá þekktasti þeirra, Fjalla-Eyvindur. Útilegumenn leituðu yfirleitt skjóls í fáförnum óbyggðum eins og á miðhálendinu. Hraunbreiður voru ógreiðar yfirferðar og auðvelt að leynast í þeim og jafnvel hægt að finna þar hella. Ódáðahraun var e.t.v. þekktasti dvalarstaður útilegumanna, en það nær nánast að Svartárkoti. Sá bær er í reynd eina byggða bólið í grennd við þetta fyrrum illræmda greni útilegumanna. Sögur af útlögum, allt frá Gretti sterka til Fjalla-Eyvindar á 18. öld, eru enn við lýði í Bárðardal.
Sýningin
Það er vel við hæfi að sýning um útilegumenn sé haldin að Kiðagili í Bárðardal. Titill sýningarinnar er Útilegumenn í Ódáðahrauni - goðsögn eða veruleiki? Þar er gefið yfirlit yfir allar hliðar íslenskra útilegumanna, sérstaklega í nágrenni Bárðardals og með hliðsjón af þjóðsögum og munnmælasögum vítt og breitt um landið.
Þjóðsögur
Útilegumenn voru ekki bara illgjarnir stigamenn og þjófar heldur líka gjöful uppspretta fyrir ævintýraþrá fólks sem var hneppt í vistarbönd og hafði að litlu að hverfa. Mikill fjöldi sagna er til af samskiptum byggðamanna og útilegumanna sem hafa leynst einhversstaðar á ókönnuðu hálendinu. Útilegumennirnir, sem oft eru á flótta undan réttvísinni, eru sagðir lifa frjálsu lífi eins og góðbændur í einangruðum dölum, þó oft séu rán og gripdeildir þeim mikilvæg tekjulind. Trúin á útilegumenn var enn svo svo sterk á 19. öld að ævintýramenn bjuggu sig út með nesti og nýja skó að finna þá. Þeim tókst þó ekki að finna neinn útilegumann þó rústir á hálendinu sýni að einhverjir útilegumenn hafi vissulega dvalið þar, þó ekki hafi þeir lifað því góða lífi sem ævintýrin segja frá.
Sýningin er hönnuð af Sögumidlun ehf
